ਮੁਹੱਬਤਾਂ ਦੀ ਗਾਥਾ

ਡੂੰਘੇ ਗਹਿਰੇ ਅਹਿਸਾਸ
ਮੇਰੀ ਸਮਝ ਤੋਂ ਬਾਹਰ ਨੇ
ਮੈਂ ਸਰਲ ਤੇ ਸਾਦੀ ਜਹੀ
ਭਾਸ਼ਾ ਹੀ ਜਾਣਦੀ ਹਾਂ
ਜਿਵੇਂ ਰੁੱਖਾਂ ਦੀ ਜੀਰਾਂਦ
ਫੁੱਲਾਂ ਦੀ ਬਾਗਾਤ
ਚਹਿਕਦੇ ਪਰਿੰਦੇ
ਝਰਨਿਆਂ ਦਾ ਗੀਤ
ਪੰਜਾਂ ਪਾਣੀਆਂ ਦੀ ਗਾਥਾ
ਕੋਇਲ ਦੀ ਕੁਹੂ ਕੁਹੂ
ਅੰਬੀਆਂ ਨੂੰ ਬੂਰ
ਹਵਾਵਾਂ ਦੇ ਬੁੱਲੇ
ਸੂਰਜ ਦੀ ਲਾਲੀ
ਆਥਣ ਦਾ ਵੇਲਾ
ਘਰਾਂ ਨੂੰ ਮੁੜਦੇ
ਵਗਾਂ ਦਾ ਝੁਰਮਟ
ਸੁਰਮਈ ਅੰਬਰ
ਤਾਰਿਕਾ ਮੰਡਲ
ਮਮਟੀ ਤੇ ਦੀਵਾ
ਨਿੰਮੀ-ਨਿੰਮੀ ਲੋਅ
ਮਾਂ ਦੀ ਲੋਰੀ
ਸ਼ਬਦਾਂ ਦੀ ਮਿੱਠਤ
ਨੈਣਾਂ ‘ਚ ਨੀਂਦਰ
ਸੁਫਨੇ ਸਲੋਨੇ
ਨਿੱਕੇ ਨਿੱਕੇ ਸੰਵਾਦ
ਨਿੱਕੇ ਨਿੱਕੇ ਬੋਲ
ਮੁਹੱਬਤਾਂ ਦੀ ਗਾਥਾ।